أنا وغنم أمـــــــي

السلام عليكم
اخوكم الحتمي عضو جديد توني ساكن
ومع ان توني ساكن إلا إني قليل أدب ولله الحمد << يقصد انه باقي في أدبه مرقه
كلبشني خالد الشوق بسبة الفراعنه ويتهمني بالتعصب له وتوني طالع من التوقيف << ياخي مالك الا اسبوع وعلى طول توقيف

طبعاً محاتسيكم قروي
إلا قروي مع مرتبة الشرف
من ضمن هواياتي (الحذيفي)
وبشرح لكم اللعبه الحين
تخيلوا العالم في العصر تذاكر والا تروح للأنديه تلعب كوره وحنا ياعيال القريه نسوي فريقين
كل فريق يتكون من خمسة اشخاص (اقل تشكيله لاعبين) طبعاً بعد اختيار التشكيله يكون فيه فريقين
الفريق الاول يروح في أول الشارع والفريق الثاني يروح في آخر الشارع
بعدها نجمع الحصى كل واحد يعبي (حثل الثوب)
بعدها نبدا نلعب والفريق الجيد الللي يكثر الاصابات في الفريق الثاني وهاتك ياحذف
احيانا اذا الفريق مكتمل تمتلي سما القريه حصى تذكركم برشاشات صدام المضاده يوم تغير عليهم الطيارات الامريكيه
!!
ونواصل إلين تغيب الشمس بعدها نجتمع يالفريقين ونضحك على بعض وبصراحه اول مالعبنا هاللعبه كنا هواه يعني ماتحصل المباراه مخلصه الا والدم لالركب
اللي جبهته منشلخه واللي طايرتن صابونة ركبته وهلم جراً بعد ماصرنا محترفين صارت الأهداف قليله

أحيانا نوقف المباراه وهي في عزها ونسوي وقت مستقطع إذا طلعت أحد حريم القريه وهي مسيره على جارتها (قهوة عصر)
وتحصل كل واحد فينا حصاته في يده ننتظر بس متى تدخل المره البيت ويبدا اللعب على طول حتى قبل يصفر الحكم

نجي للموضوع اللي حاط له عنوان ونسيته
هذي الوالده سلمكم الله حاطتن لها معزا تقريباً عشر حبات << حبات !! طلعت كبتاقون هذي مو غنم
ماعلينا
وبصراحه الوالده الله يطول بعمرها تحب معزاها أكثر منا
وحكمتها في الحياه تقول عنز في الشبك ابرك من عشرة بزارين في الشارع

المهم سلمكم الله العنز تحب الأكل والشعير ماكنا نعرفه بحكم ان القريه مليانه مزارع متوسط أكل العنز في اليوم كيلو برسيم اخضر << قلبها حصة اقتصاد هذي الوجبه الرئيسيه
بالنسبه للمقبلات احيانا نجيب لها جح نص استعمال واحيانا يجينا خالي من المدينه ويجيب معه خبز يابس
طبعا خالي عسكري ويروح لمطعم العسكر بعد مايخلصون الفطور يزيد الخبز ويحطونه في شبك وفي آخر الاسبوع يجي خالي احياناً وياخذ الخبز يابس ومن غلاة امي عنده يجيبه لغنمها في حوض ددسنه
طبعا امي تعز خالي وهو نفس الطريقه ,, مره جاب لها (جلال هديه) يعني انه متطور يسمع بالهدايا قالت الله يهديك ياوخيي لو انك جايب خبز للغنم كان اصرف << امه ماتعرف تجامل أبد

المهم سلمكم الله البرسيم من يجيبه ؟! اكيد انا واخواني نروح ناخذ لنا خياش فاضيه سوا حقت شعير او ذره او رز وإذا جا الظهر نروح لمزرعة جدي ونحش من البرسيم حقها واحيانا اذا مافي برسيم نحش العشب الزايد المهم مايجي العصر الاوحنا معبين الخياش علف أهم شي تجي الخيشه مليانه ,, اذا رجعنا نسلم العهده اللي هي الخيشه بما فيها والمحش (بالمناسبه أحياناً يجينا ظرف طارق وينكسر المحش وحنا شغالين ونروح ندور لنا أستك كفره ونربطه فيه الين يصير المحش كله بلاك << بلاك ولا شيفاز

انا في أحد المرات حقدت على غنم امي قلت لواحد من اخواني ليه مانروح نقضي عليها !!!
اخوي ايدني بقوه ومن زود حماسه حمرت عيونه وطلع له قرون مثل قرون ابليس حق الكراتين
المهم ونجي مره في الضحى وننط في الشبك
قلنا أهم شي الزعيم مانتعرضه << يقصد التيس مو الهلال ,,,, طيب كيف ننتقم من الغنم قال اخوي ناخذ لنا جريد نخل ونجلد كل عنز لحالها إلين تعض الارض
قلت تم طيب لازم نجلدها صح وش الدبره ؟1 وطرت علي فكره قلت انا بمسك العنز اللي نبي نطقها وانت اجلدها بالجريده قال طيب
فيه عنز بنت كلب
وعزيزه على امي (امي من زود غلاة معزاها عندها مسميه كل عنز بإسم ) عاد لو لحقت امي على القنوات الفضائيه كان تحصلها مسميه كل عنز باسم فنانه ,, العنز روبي وإذا العنز ديودها كبار أكيد بتسميها أليسا

المهم العنز هذي اللي امي تحبها اسمها (طعزه) وقرون العنز هذي كبيره مره
قلت لاخوي انا بمسك طعزه بقرونها وانت اسطرها بالجريده حقت النخل ولا اوصيك حط حيل أمك وأبوك << أبوه وأمه عنده ذيك الأيام أطلق من أندر تيكر المصارع!!
وانط على طعزه بنت الكلب وامسكها بقرونها وتقوم تفرفر بي في الشبك وانا متجود فيها واصيح << انتم بس تخيلوه وهو ماسكها وهي تسحب به من زاويه لزاويه ,, واصيح على اخوي نعنبوك اجلدها وهو كل ماجا يجلدها تروغ عنه ويجي وجهي في وجهه تمزع ثوبي الوحيد وتمزع بطني من طعزه بنت الذينا والله من النشاط فيها<< بلاها والله من البرسيم اللي تعطيها اياه
وفي لحظه من لحظات التاريخ يتوقف الزمن لبرهه ويغمض أخوي يوم اقبلت عليه انا وطعزه ويرفع يدينه فوق والجريده في يده وكان آخر مشهد شافه قبل يقفل عيونه يوم انا ناشب في قرون عنزنا طعزه ومتوجهين ناحيته شوي الا
طرررررررررررررررررراااااااااخ
ضربني انا على راسي بدل العنز

وهو ضرب والا ماضرب انا ماعاد شفت شي ومدري وين انا فيه مادري هو انا ماسك طعزه والا هي ماسكتني المهم اني أذكر اني كنت في ظلما وجاني ضوء أزرق مثل البرق وطفى على طول مثل الفيوز حق النجافه إذا اشتغل وطفى!!
فتح اخوي عيونه إلا وأنا مجندل على الأرض ووجهي غاطس ومسوي حفره وسط الزريبه ويحصل اثار سحبة براطمي في زريبة الغنم يمكن اثنين متر قبل أتوقف ويقلبني على ظهري الا وفمي مليان تبن ومعه شوية دمن يابس !!
ومن ذيك الايام الى يومكم وانا مفهي وحالتي حاله
عاد هو قام يحت التراب والتبن والدمن عني بس ماش الوضع مزري بقوه ,, تبون الجد ودي اسطره على الجلده اللي جلدني اياها بس مافيني حيييييييييل خارت قواي بسبة طعزه الله لايوفقها ومن عقبها وانا ما أتعرض الغنم خير شر حتى عنز امي طعزه إذا طالعت فيني وقزتني بنظراتها أدنق وانزل عيوني في الارض << كسرت عينه العنز ههههههههههه

وسلاااااااااامتكم
مشاركه من وحي الخيال أتمنى تعجبكم


دمتم بود

هههههههههههه طعزه ... اتوقع الاسم هذا بوقتهم الحائز على جائزة الاوسكار ...هههههههه
وحلوه اليسا وروبي .... ياعيني ياعيني ....اكيد اختصاصهن عند المعزى الفن والاستعراض .الله يعطيك العافيه يالحتمي .

ههههههههههههههههههههههه

أبو جندل واللهـ انك منتهي

طعزه <<<<<<< ليش طيب ليش ههههههههههههههههه

ابي اسمي المولودهـ الأولى طعزهـ << وش عندهـ المتزوج

مـشكور الحتـمي و ما قصرت

مرااااحب ابو طعزه
بيصير نغم الاسم
مشكور ابو جندل

هلابك
يا هكرنا العزيز
منور


تشكورات

هههههههههههههههههههههههههههههههههههههههههههههههههه ههههههههههههههههههههههههههههههه

الله يقطع بليسك يالحتمي

قسم تمزعت تسبدي من الظحك

الله مير يوسع صدرك بالعافيه

والبنسبه للاسم صراحه حرررررررررررررررركه

ابسميه لاول بنت تجيني هععععععععععععع

يامال العافييه ع الموزوع

وتقبل مرور مسرعهـ بشويشـ
................

فديت سبدك نيهاااااااااا <<<<<<< ضحكة البرائه ...
تثلمين بقوه على مرورك يالمطفوقه هههههه <<<<< مسرعه بشويش ...
بلاك <<<<<<ج ويتم تغييرها حتى مايفسرونه اهل العقول المنسمه
بلاتس ماصكك حدى هالتماسيح وارصعك بمخالفه والا كان اسمك ماشيه بشويش
ههههههههههههههههههه

تسلمبن على مرورك المره حلو

هههههههههههههههههههه

ههههههههههههه


قصه ولا آحلى ..

مغااامرات حلووه ..

يعطيك الـ ع ـــآفيه ..

شـكــ وبارك الله فيك ـــرا لك ... لك مني أجمل تحية .

الله يعافيك رعش قلبي

نورتي الموضوع